B Mzukona Mantshontsho
Kubalulekile kwakha nekusita titukulwane letisasetikolweni nebantfu labasha bonke, ikakhulu kati labangasebenti, kutsi babone nekutsi bati ngebhizinisi kubantfu lasebacalile, tingcinamba labahlangabetano nato, nekutsi badlule kanjani kuto, njengoba imisebenti ingekho eveni LakaNgwane.
Kubalulekile kutsi labantfu labasha babone bantfu emindenini, naseveni lasebacalile, kute bakhutsateke kutsi nembala kuyenteka, ngimbonile makhelwane wami acala, namhlanje ngifuna kufana naye, nobe ngibe ncono kakhulu kunaye, ngitekwati kukhulisa umdeni wami, ngibe sakhamuti lesitimele, nekuba lilunga emphakatsi kusasa lelitawenta sive sitigcabhe ngalo.
Siphila eveni lapho kungasebenti kwanzile, kuphindze kusabise ngoba labanye bafundzile kodvwa bahleti enhluphekweni naleyofundvo yabo, kubuhlungu, kuyadzabukisa!
Tepolitiki netemnotfo eveni lonkhe leAfrica, lenta labangenta kubekhona imisebenti bayahocise timali tabo, ngobe emave lamanengi ayahilitisana ngaphakatsi kwawo, kucala emabhizinisi ngiko lokungasenta sitimele sibantfu labasha ikakhulu eveni.
Imigaco siseko lebhekene nekucala libhizinisi nako kuyangeta kubantfu bagcine bangacala, loko asikudzingi, kufuneka kwehliswe letidzingo tekucala libhinisi lelisemtsetfweni.
Kubalulekile kutsi Hulumende angayekeli kukhutsata nekusingatsa bantfu eveni kutsi bacale emabhizinisi, batondle nemindeni yabo. Ngephandle kwekubambisana kwaHulumende, bahlali, nemabhange, kute lokutawusita sive saseSwatini.
Ndiphethe walonyaka sitabe sitsi sineminyaka lengemashumi lasihlani nesiphohlongo [58] live labuya ebantfwini lamamhlophe kodvwa sive solo sitfwele kamatima yinhlupheko.
Ngitimisele kuba neludliwano ndlebe nabosomabhizinisi labangemashumi lamatsatfu [30] kaManzini edolobheni, kusekela kumabhizinisi lamancane, lamakhulu, lentiwa boMake, lentiwa bantfu labasha, nalakhubatekile, kute sitfole umehluko wemibono netingcinamba lababheka nato.
Ngitimisele kutsintsana nemabhange ngivisise kutsi bentani kusingatsa nekubambisana nabosomabhizinisi kute batfole konkhe labakudzingako kute bandlondlobale, baye phambili, bondle imindeni yabo nelive lonkhe likhule.
Ngitimisele kutsintsana naHulumende kutsi uwasita kanjani emabhizinisi lasakhasa kutsi aphumelele, layo lasakhulile, asimame aye phambili, ente likusasa lelichakazile eveni lonkhe.
Ngaphandle kwekuhlanganisa lemibono yalabosomabhizinisi labahlukene, ngitimise kwakha umtapo welwati ngetindlela labacale ngato, tihibe labatibonile, nekutsi bandlule kanjani kuto.
Lolwati lutawusetjentiswa ngunobe ngubani, afundze kuwo, atsatse lakudzingako, ayekele langakudzingi.
Loko ngicabanga kutsi kungakhutsata kutimela, kubuka sidzingo endzaweni lohlala kuyo, ucale libhizinisi lakho, uchumane nebatjali timali mangabe uyayidzinga, uchumane nelihhovisi lelihambela nelibhizinisi lakho, usitakale, uye phambili.
Unalo nelilungelo lekuchumana nelibhange lelingakusita kulelobhinisi lakho. Loko kutawenta umahluko lomkhulu eveni lonkhe.
Angisho kutsi lowo lengitokhuuma naye somabhizinisi utawusita wonkhe wonkhe, kodvwa sitabe sicale kukhutsata umoya webhizinisi, nekutsi nembala kuyenteka mawutimisile, uyikhutsalele ingubo yakho, utawuphumelela.
